La Lliteratura Infantil y Xuvenil n’asturianu nos 25 caberos años: formatos, temátiques y camín de futuru

Abstract

La Lliteratura Infantil y Xuvenil (LLIX) constitúi ún de los sofitos de la tresmisión de la llingua y la cultura pa neñes y neños. Los currículos vixentes de Llingua Asturiana y Lliteratura d’Educación Primaria y Educación Secundaria Obligatoria planteguen, ente los sos saberes básicos, la llectura d’obres que s’afaigan a los intereses de los escolinos y la conocencia del patrimoniu lliterariu asturianu y de la lliteratura actual. Nesti sen, precísase de revisar si los formatos, temátiques y xéneros de los llibros infantiles y xuveniles n’asturianu respuenden a los intereses de los rapacinos y a les tendencies lliteraries actuales. Poro, nesti trabayu ufiértase un percorríu peles obres infantiles y xuveniles nos 25 caberos años. Pa ello, creóse una base de datos con un corpus de 462 obres espublizaes n’asturianu dende l’añu 2000 al 2024. Pa la clasif icación de los resultaos estrayíos, aplicóse’l criteriu d’edá, temática, complexidá llingüística y xéneru/subxéneru. L’análisis que s’ufierta faise en función de los xéneros/subxéneros lliterarios, les temátiques y los formatos, rellacionando los resultaos coles tendencies de LLIX nel ámbitu hispánicu y trazando una perspeutiva de futuru pa cola LLIX n’asturianu.