Expresiones del poder nun paisaxe rural del occidente asturianu [II]. Segunda intervención arqueolóxica n'El Palaciu (La Puela, Ayande)

Abstract

Nel 2023 desenvolvióse la segunda campaña arqueolóxica n'El Palaciu (palaciu de Cienfuegos y Peñalba), ente La Puela y Cimalaviḷḷa (Ayande). Estos trabayos inxértense nel programa d'actuaciones del proxecto TemPa, qu'analiza los cambios del paisaxe nel suroccidente asturianu dende'l sieglo XVI hasta l'actualidá. L'obxectivo xeneral d'estes actuaciones yera avanzar na reconstrucción diacrónica del palaciu, la so contorna y los dos núcleos de población inmediatos. Los obxectivos particulares yeren dos: 1) Verificar y caracterizar arqueolóxicamente delles anomalíes detectaes nes prospecciones xeofísiques nel 2022; y 2) Ampliar la prospección con xeorrádar y magnetómetro a les güertes de La Casina, más cerca del llugar de Cimalaviḷḷa, onde identificáramos una estructura na escavación del 2022. Aparte de lo anterior, ente los llabores d'esta campaña incluyóse un análisis más detalláu por persones especialistes de los materiales y muestres recoyíes nes dos intervenciones.