Llingua ya instrucción na Ilustración Asturiana

Abstract

El periodu ilustráu español carauterízase nel planu llingüísticu pol desarrollu d’un procesu d’homoxeneización castellanista dirixíu poles élites reformistes que, más alló del marcu alministrativu, buscará una unificación idiomática de calter social acordies coles teoríes desenvueltes pol iluminismu francés, na que la instrucción xugará un papel cimeru. Dientro d’esti marcu, la figura de Gaspar Melchor de Xovellanos foi davezu presentada como una rara avis enfotada na vindicación de la investigación y l’enseñu de les llingües llariegues. Ensin poner en duldes la relevancia del llabor desencolcáu por Xovellanos en favor del estudiu y normativización de la llingua asturiana, esti trabayu quier analizar la conceición llingüística que movilizaba la xera del complexu y contradictoriu ilustráu xixonés, cola fin de rescamplar los enclinos funcionalistes y subordinadores que marcaben les sos actividaes y propuestes y que van influyir decisivamente nos plantegamientos que nes décades vinientes remanará la corriente de rexonalismu cultural por él entamada.