Trabayar por proyectos na asignatura de Llingua asturiana y Lliteratura na ESO

Abstract

L'asignatura de Llingua Asturiana y Lliteratura ye optativa na Educación Secundaria del Principáu d'Asturies y ufiértase dende'l cursu 1987-1988. Anguaño, el porcentaxe de matrícula ye pequeñu y el profesoráu atópase con una gran diversidá nel aula, tanto poles conocencies llingüístiques como pola motivación nel deprendizaxe. Esti estudiu naz de la necesidá del profesoráu de Llingua Asturiana y Lliteratura d'atender a esi alumnáu diverso y plantégase l'oxetivu de conocer la visión que los docentes de l'asignatura tienen de los métodos qu'usen nel aula, y comprobar si'l trabayu por proyectos pue influyir na meyora de la espresión llingüística del alumnáu, na so motivación pal deprendizaxe y nel desarrollu de competencies y valores socioeducativos. Pa ello entámase dende un diseñu d'investigación basáu na complementariedá metodolóxica. Asina, pa llograr datos sobre les práctiques docentes declaraes, aplicóse'l cuestionariu CAPLALESO (Cuestionariu Anónimu pal Profesoráu de Llingua Asturiana y Lliteratura n’Educación Secundaria Obligatoria) al profesoráu actual de l'asignatura, llográndose resultaos no que cinca a competencies del alumnáu y del profesoráu, programación, metodoloxía nel aula, recursos y procedimientos d'evaluación que s'analizaron en rellación cola edá, xéneru, años d'esperiencia, allugamientu del centru, nivel educativu impartíu, formación académica, situación alministrativa, participación en formación continua y autoadscripción a un enfoque na enseñanza de Llingua Asturiana y Lliteratura. Los datos llograos compleméntense cola observación participante a lo llargo de 49 sesiones n'aules nes que se trabaya por proyectos, l'análisis documental (27 programaciones d'ESO y Bachilleratu y 19 cuadernos d'aula) y dos grupos de discusión: unu de profesoráu y otru d'alumnáu de l'asignatura.