Sintaxis de los complexos verbales y posición de los clíticos n’asturianu

Abstract

La presencia de más d’un verbu en forma personal orixina complexos verbales de dos tipos: conxuntos (cvc) o dixuntos (cvd). Nel primer casu dambes formes establecen una relación d’interdependencia, mientres que nel segundu hai una relación de subordinación ente nucleu y axacente. Cuando a los complexos verbales se suma la presencia de clíticos, referentes del cd o ci, estos adopten una posición sintagmática básica en secuencies neutres: la enclisis (Voi dicí-yoslo /*Yos lo voi dicir). En cambiu, la presencia d’un elementu focal como la negación permite la llibre alternancia (Nun voi dicí-yoslo ~ Nun-yos lo voi dicir). La posibilidá d’asitiase llibremente en posición preverbal o postverbal nun se tien considerao un trazu esclusivu de los conxuntos perifrásticos, pues tamién otros complexos dixuntos amuesen el mesmu comportamientu respecto a los clíticos (Nun necesites vendela ~ Nun la necesites vender). Esamínase equí’l comportamientu sintácticu de conxuntos verbales perifrásticos y non perifrásiticos teniendo en cuenta la posición de los pronomes átonos. L’análisis revela que la llibre alternancia de los clíticos guarda estrecha relación con factores sintácticos y semánticos: a) el funcionamientu del complexu verbal como un conxuntu solidariu; b) les valencies combinatories de los lexemes implicaos, esto ye, la capacidá combinatoria de los verbos pa dotase d’axacentes de categoría sustantiva; c) la posibilidá d’aparición d’anfiboloxía referencial.